تنهدت تنهيدة طويييلة بعدما لفحني هوا بارد لوجهي... تنهيدة السجين أول ما يخرج من حبس سرقلو عمرو وياماتو وأغلى الأشياء عندو..
مشيت و ورايا كابة فيها 14 سنة من عمري 14 سنة فيهم قاسيت لي منتمناهش لعدويا.. خسرت يما.. يما لي كانت كل شهر تطل عليا والوحش باين من عينيها خايفة عليا لأني غايبة عن عينيها.. كانت كي تخاف عليا تجي ليا.. مي أنا نهار غابت مقدرتش نروح ليها. مشفتش واش عاشت قبل متروح.. كانت فرحانة ولا كانت تبكي؟ يما مرضت ولا بقات صحيحة كما عرفتها؟ معرفتش.. مكاش لي جاوبني.. نشفا غير الساعة لي جا فيها بابا عندي وقالي.. "عظم الله أجرك يماك ماتت يا بنتي.."
من وقتها ما شفت لا يما.. لا بابا..
أنا نور.. من احدى ولايات الغرب الجزائري من عائلة ميسورة الحال الحمد لله عمري 18 سنة، شعري كحل عينيا قهويين وجهي مدور وعندي شفايف منفوخين مي لاطاي والوو حرفيا انا ضعيفة بزاااف.. وضرك نحكيلكم على حياتي
أنا من كان عندي 4سنوات مرضت بالسرطان ـــــ عافانا الله وإياكم ـــــ وتعالجت منو والحمد لله.. مي بعدها بحوالي عام او عامين بعد انتهاء العلاج، ولاو يصراو معايا صوالح مشي نورمال كنت من أقل جهد نعيا ونفشل خلاااص منقدرش مام نتنفس عليها ماما منعت عليا الخروج متحججة بانو يمكن مزلت نحتاج الراحة..
مي الحكاية محبستش هنا.. من وليت نتعب كثر وكثر وصحتي تسوء جراو بيا للطبيب و للأسف لقاو انو تعرضت لمضاعفات وتفاقم الأمر وهكا حتى لقيت روحي فشومبرا بيضا بلزرق بين ربع حيوط نتعالج من مرض القلب لي دالي سنين عمري.. حاول بابا وبواسطة نفوذو انو يديني للدار وصح قعدت مدة ثماك مي بعدما ولاو الذراري لي كانو فسني يجو ويعيبو عليا وحالتي تتدهور رجعوني للسبيطار. وهكاك كبرت ثم بين ليباري والدواوات. نشوف وجوه يتبدلو وحدين يروحو ووحدين يجو غير انا قاعدة ثم لكن الحمد لله على كل حال.. كانت ماما هي وبابا يجو ليا كل سمانة او شهر علاحساب ما يحددلهم الطبيب وبحكم اني وحيدتهم كانو يحسو بغيابي بزاااف سورتو ماما.. وهكاك بقيت ولمدة 10 سنين نستنا وينتا تطل عليا يما.. لكن فوحد النهار ما طلتش.. وطل فبلاثتها بابا لآخر مرة يقولي بلي يما خلاص راحت.. مي مقاليش بلي هو ثان راح يروح.. مي بعدو عمتي أمينة ولات تجي عندي وتحاول تتهلا فيا هي ومرت خالي لي هي تكون بنت عمي حتى والفتهم غير هوما بصح وحتى لليوم كنت نستنا فبابا يطل.. مي مطلش
قطع تخمامي صوت عمتي ومرت خالي وين كانو يعيطو عليا
"يا طفلة خلعتينا درت هك مصبتكش يا وخذتييي.."
حطت يدها على صدرها ومبلڨة عينيها تحسبوها صح بزاااف نخلعت.. ضحكت على ردة فعلها بشوية حتى جات مرت خالي تمسح على كتفي بلعقل وتقول
"خفنا عليك يا بنتي.."
تبسمتلها ثان.. لأنو حاليا الاجابة الوحيدة لي عندي هي مجرد تبسيمة نداري بيها خوفي.. ڨارات قدامنا طونوبيل كحلة كامل راحت عمتي قدامنا قالتلنا
"هيا هاو جا أدهم "
خزرت في مرت خالي شيرتلي بعينيها تاع متخافيش..مي انا مكنتش خافية..وانما لمحة من الذاكرة جازت عليا..أدهم!!كفاه ننسا لي ونحنا صغار كان دايما الوجه الوحيد لي نشوفو بين كل الوجوه..منشفاش عليه وانا بنت 4 سنين..مي نشفا من كان يجي ليا بالسرقة من كنت نتعالج فدارنا وحتى فالسبيطار مع عمامي وبابا..مي ممبعد غاب وجهو عني كما دارو كامل، جيت نهز فاليزة قاتلي خلي عليك وليت حطيتها وهي سندتني باش نمشي.. كي وصلنا عندها نزل منها راجل طويل لابس عباية مي منكذبش عليكم يخوف..سلم على عمتي ومرت خالي مي هي من البعيد برك وكي وصل قدامي هبط عينيه ونطق بصوت واطي
"الحمد لله على سلامتك بنت العم"
صوتو كان دااافي.. الدفا لي نسيتو من نهار غابت يما.. هزيتلو راسي وتبسمت.. فتحلي الباب وهزيتلو راسي بالمعنى تاع صحيت زادت ركبت مرت خالي وعمتي وهو رفد ليفاليز وبقيت نشوف من الكارو للبلاصة لي جوزت فيها عمر بطولو ونودع فيها..
_____________________
نهاية الفصل الأول..
شرايكم🦋🌸
